सिड्नी- अस्ट्रेलियाको संघीय सरकारले नयाँ आर्थिक वर्षको सुरुआतसँगै जुलाई १ देखि लागू हुने गरी विद्यार्थी भिसासहित विभिन्न भिसाको शुल्क वृद्धि गरेको छ। यस निर्णयले विशेषगरी अन्तर्राष्ट्रिय विद्यार्थी, ग्राजुएट भिसा आवेदक तथा विदेशी कर्मचारी प्रायोजन गर्ने कम्पनीहरूमा थप आर्थिक भार पर्ने भएको छ।
अस्ट्रेलियाको गृह मन्त्रालयका अनुसार विद्यार्थी भिसा (सबक्लास ५००) को आवेदन शुल्क २ हजार अस्ट्रेलियन डलरबाट बढाएर २ हजार ५ सय अस्ट्रेलियन डलर पुर्याइएको छ। पछिल्लो दुई वर्षमा मात्र विद्यार्थी भिसा शुल्क ७१० डलरबाट बढेर २ हजार ५ सय डलरसम्म पुगेको हो।
सरकारले पहिलो पटक अंग्रेजी भाषा (इङ्लिस ल्याङ्ग्वेज) अध्ययनका लागि मात्र आउने विद्यार्थीका लागि छुट्टै भिसा शुल्क निर्धारण गरेको छ। यसअघि अन्य विद्यार्थीसरह शुल्क तिर्दै आएका उनीहरूले अब २ हजार ५० अस्ट्रेलियन डलर तिर्नुपर्नेछ।
शैक्षिक संस्थाहरूले अन्तर्राष्ट्रिय विद्यार्थी आकर्षित गर्न भिसा शुल्क घटाउन सरकारसँग आग्रह गरिरहेका बेला सरकारले भने शुल्क बढाउने निर्णय गरेको हो। यता, नेसनलिस्ट राजनीतिक दलहरूले विदेशी आप्रवासनको प्रभाव नियन्त्रण गर्न कडा नीति अपनाउनुपर्ने माग गर्दै आएका छन्।
विद्यार्थीले अध्ययन पूरा गरेपछि काम गर्न पाउने ग्राजुएट भिसा (सबक्लास ४८५) को शुल्कमा पनि थप वृद्धि गरिएको छ। यसै वर्ष मार्चमा २ हजार ३ सय डलरबाट बढाएर ४ हजार ६ सय डलर पुर्याइएको शुल्क चार महिनामै पुनः बढेर ५ हजार ७५० अस्ट्रेलियन डलर पुगेको छ।
जुलाई १ देखि अधिकांश स्किल, पार्टनर तथा वर्किङ होलिडे भिसा को शुल्क पनि बढाइएको छ।
त्यस्तै, अध्ययनपछि सम्बन्धित क्षेत्रमा रोजगारीका लागि प्रायोजन गरिने सबक्लास ४८२ र ४९४ भिसाका लागि आवश्यक न्यूनतम वार्षिक पारिश्रमिक ७६ हजार ५१५ डलरबाट बढाएर ७९ हजार ४९९ अस्ट्रेलियन डलर निर्धारण गरिएको छ। यसले विदेशी कामदारलाई प्रायोजन गर्ने रोजगारदाता कम्पनीहरूमा पनि अतिरिक्त आर्थिक दबाब पर्ने अपेक्षा गरिएको छ।
विशेषज्ञहरूका अनुसार यी परिवर्तनको सबैभन्दा बढी प्रभाव अध्ययन पूरा गरी अस्ट्रेलियामै रोजगारी र स्थायी बसोबासको प्रक्रिया अघि बढाइरहेका अन्तर्राष्ट्रिय विद्यार्थीहरूमा पर्नेछ।
अस्ट्रेलियाको गृह मन्त्रालयले यी सबै नयाँ शुल्क र मापदण्ड २०२६ जुलाई १ देखि अनिवार्य रूपमा लागू भइसकेको जनाएको छ।
