काठमाडौं -लगातारको वर्षापछि देशका विभिन्न जिल्लामा बाढी र पहिरोको प्रभाव बढ्दै जाँदा सोमबार देशभरका ८ वटा प्रमुख सडक पूर्णरूपमा अवरुद्ध भएका छन्। यस्तै, दुईवटा राजमार्गमा एकतर्फी रूपमा मात्रै सवारी सञ्चालन भइरहेको नेपाल प्रहरीले जनाएको छ।
प्रहरीका अनुसार इलाम नगरपालिका–९ राजदुवालीमा पहिरो खसेपछि मेची राजमार्गअन्तर्गत झापा–ताप्लेजुङ सडकखण्ड पूर्णरूपमा अवरुद्ध भएको छ। सडक बन्द भएपछि सवारी साधनलाई वैकल्पिक मार्ग प्रयोग गर्न आग्रह गरिएको छ।
यस्तै, सिन्धुली हुँदै काठमाडौं जोड्ने बीपी राजमार्ग सम्भावित बाढीको जोखिमका कारण तत्कालका लागि बन्द गरिएको छ। नदीमा पानीको बहाव बढ्न सक्ने जोखिमलाई मध्यनजर गर्दै सवारी आवागमन रोकिएको प्रहरीले जनाएको छ।
मकवानपुरको भीमफेदी गाउँपालिका–८ भर्याङडाँडामा पहिरो खसेपछि कान्ती लोकपथ पनि पूर्णरूपमा अवरुद्ध बनेको छ। पहिरो हटाउने काम भइरहे पनि सडक सञ्चालनमा आउन केही समय लाग्न सक्ने जनाइएको छ।
यसैगरी बाढी र पहिरोका कारण अरनिको राजमार्ग, पोखरा–ताङतिङ सडक, घोराही–रुकुम शहीद मार्ग, सालझण्डी–ढोरपाटन सडक तथा मदन भण्डारी राजमार्गमा समेत सवारी आवागमन पूर्णरूपमा ठप्प भएको प्रहरीले जनाएको छ।
उता, भोजपुरमा मध्यपहाडी राजमार्ग र पाल्पामा सिद्धार्थ राजमार्गमा भने एकतर्फी रूपमा मात्रै सवारी सञ्चालन भइरहेको छ। यी सडकमा यात्रा गर्ने सवारी चालकलाई उच्च सतर्कता अपनाउन आग्रह गरिएको छ।
लगातारको वर्षा अझै जारी रहने मौसम पूर्वानुमान रहेकाले बाढी, पहिरो र डुबानको जोखिम उच्च रहेको भन्दै प्रहरीले अत्यावश्यक कामबाहेक जोखिमयुक्त सडकमा यात्रा नगर्न तथा यात्रा गर्नुअघि सम्बन्धित जिल्ला प्रशासन, ट्राफिक प्रहरी वा सडक विभागबाट सडकको अवस्थाबारे जानकारी लिन आग्रह गरेको छ।
पूर्ण रूपमा अवरुद्ध सडकहरू
- मेची राजमार्ग (इलाम–झापा–ताप्लेजुङ सडकखण्ड)
- बीपी राजमार्ग
- कान्ती लोकपथ
- अरनिको राजमार्ग
- पोखरा–ताङतिङ सडक
- घोराही–रुकुम शहीद मार्ग
- सालझण्डी–ढोरपाटन सडक
- मदन भण्डारी राजमार्ग
एकतर्फी सञ्चालन भएका सडकहरू
- मध्यपहाडी राजमार्ग (भोजपुर)
- सिद्धार्थ राजमार्ग (पाल्पा)
बाढी–पहिरोका कारण सडकको अवस्था जुनसुकै बेला परिवर्तन हुन सक्ने भएकाले यात्रु तथा सवारी चालकलाई सम्बन्धित निकायबाट अद्यावधिक जानकारी लिएर मात्रै यात्रा गर्न प्रहरीले अनुरोध गरेको छ।
