काठमाडौं – देशभर मनसुनी वायु पूर्ण रूपमा सक्रिय भएसँगै वर्षाको क्रम थप तीव्र बनेको छ। मौसम पूर्वानुमान महाशाखाका अनुसार असार १६ गतेदेखि मनसुन देशभर फैलिएको प्रभावले अधिकांश स्थानमा बदली र वर्षा भइरहेको छ भने आगामी केही घण्टा पनि वर्षा जारी रहने सम्भावना रहेको छ।

हाल बागमती र गण्डकी प्रदेशका केही स्थान तथा लुम्बिनी, कर्णाली र सुदूरपश्चिम प्रदेशका थोरै स्थानमा मेघगर्जन तथा चट्याङसहित मध्यम वर्षा भइरहेको छ। कोसी प्रदेशको पहाडी भूभागका एक-दुई स्थानमा पनि वर्षा भइरहेको महाशाखाले जनाएको छ।

आज दिनभर कस्तो रहनेछ मौसम?

आज दिउँसो देशभरको आकाश अधिकांश बदली रहनेछ। हिमाली तथा पहाडी भूभागका केही स्थानमा मेघगर्जन र चट्याङसहित मध्यम वर्षा हुने सम्भावना छ। उच्च हिमाली क्षेत्रमा हल्का हिमपातको समेत सम्भावना रहेको छ।

त्यसैगरी कोसी, बागमती, गण्डकी, लुम्बिनी र सुदूरपश्चिम प्रदेशका तराईका थोरै स्थान तथा मधेस प्रदेशका एक-दुई स्थानमा पनि मेघगर्जनसहित वर्षा हुन सक्ने अनुमान गरिएको छ।

मौसमविद्हरूका अनुसार कोसी, बागमती, गण्डकी, लुम्बिनी र सुदूरपश्चिम प्रदेशका पहाडी भूभागका एक-दुई स्थानमा भारी वर्षा हुने सम्भावना रहेकाले ती क्षेत्रमा सतर्कता अपनाउन आग्रह गरिएको छ।

राति पनि वर्षा जारी रहने

महाशाखाका अनुसार राति पनि देशभर अधिकांश स्थानमा बदली कायम रहनेछ। हिमाली क्षेत्रका थोरै स्थानमा हल्का वर्षा वा हिमपात हुन सक्नेछ भने पहाडी भूभागका केही स्थान तथा कोसी, बागमती, गण्डकी, लुम्बिनी र सुदूरपश्चिम प्रदेशका तराईका थोरै स्थानमा मेघगर्जन र चट्याङसहित मध्यम वर्षा हुने सम्भावना छ।

यस्तै कोसी, बागमती र गण्डकी प्रदेशका पहाडी क्षेत्रका एक-दुई स्थानमा रातिको समयमा पनि भारी वर्षा हुन सक्ने भएकाले पहिरो, बाढी र डुबानको जोखिम बढ्न सक्ने मौसमविद्हरूले औँल्याएका छन्।

काठमाडौंमा अझै वर्षा हुने संकेत

काठमाडौं उपत्यकामा गएरातिदेखि नै वर्षा भइरहेको छ। बिहानसम्म उपत्यकाका अधिकांश क्षेत्रमा राम्रो वर्षा भए पनि अहिले केही समयका लागि वर्षाको तीव्रता घटेको छ।

मौसम पूर्वानुमान महाशाखाका मौसमविद् रोजन लामिछानेका अनुसार काठमाडौंमा मौसम केहीबेर खुल्ने सम्भावना रहे पनि फेरि बादल विकास भई वर्षा सुरु हुनेछ।

उनका अनुसार विशेषगरी अपराह्नदेखि साँझपख हल्कादेखि मध्यम वर्षा हुने सम्भावना रहेको छ। त्यसैले कार्यालय समयपछि घर फर्किने तथा यात्रा गर्नेहरूले आवश्यक सावधानी अपनाउनुपर्ने देखिन्छ।

सतर्क रहन आग्रह

निरन्तर वर्षाका कारण पहाडी क्षेत्रमा पहिरो, नदी तथा खोलामा आकस्मिक बाढी र सहरी क्षेत्रमा डुबानको जोखिम बढ्न सक्ने भएकाले सम्बन्धित निकायले सतर्कता अपनाउन तथा सर्वसाधारणलाई मौसमको अद्यावधिक जानकारी हेरेर मात्र यात्रा गर्न आग्रह गरेका छन्।