काठमाडौं - सवारी चालक अनुमतिपत्र (लाइसेन्स) प्राप्त गर्न आवश्यक स्वास्थ्य परीक्षण प्रक्रियालाई थप सहज, पारदर्शी र सेवाग्राहीमैत्री बनाउने उद्देश्यसहित यातायात व्यवस्था विभागले महत्वपूर्ण निर्णय कार्यान्वयनमा ल्याउने प्रक्रिया अघि बढाएको छ।
विभागले नेपाल मेडिकल काउन्सिलमा दर्ता भई इजाजत प्राप्त गरेका जुनसुकै चिकित्सकले जारी गरेको स्वास्थ्य परीक्षणसम्बन्धी प्रमाणपत्रलाई मान्यता दिने व्यवस्था लागू गर्न सातै प्रदेशका यातायात क्षेत्र हेर्ने मन्त्रालयहरूलाई अनुरोध गरेको छ।
विभागअन्तर्गतको सवारी अनुगमन, मापदण्ड तर्जुमा तथा सवारी चालक व्यवस्थापन शाखाका निर्देशक गणेशमानसिं राईद्वारा गत असार ३२ गते जारी गरिएको परिपत्रमार्फत उक्त व्यवस्था कार्यान्वयनका लागि आवश्यक समन्वय गर्न आग्रह गरिएको हो।
विभागका अनुसार यो निर्णय मिति २०८३ जेठ १३ गतेको मन्त्रिस्तरीय निर्णयअनुसार गरिएको हो। सोही निर्णयलाई कार्यान्वयनमा ल्याउने क्रममा सम्बन्धित निकायहरूलाई औपचारिक पत्राचार गरिएको विभागले जनाएको छ।
सेवाग्राहीको सहजतामा जोड
हाल कायम रहेको व्यवस्थाका कारण लाइसेन्सका लागि स्वास्थ्य परीक्षण गराउने सेवाग्राहीले सीमित स्वास्थ्य संस्थामा पुग्नुपर्ने, लामो लाइनमा बस्नुपर्ने, अनावश्यक भीडभाडको सामना गर्नुपर्ने तथा अतिरिक्त आर्थिक भार व्यहोर्नुपर्ने अवस्था रहेको विभागको निष्कर्ष छ।
परिपत्रमा केही सीमित व्यक्ति वा संस्थाको संलग्नताले स्वास्थ्य परीक्षण सेवामा सिण्डिकेटजस्तो अवस्था सिर्जना भएको उल्लेख गर्दै यस्तो प्रवृत्तिको अन्त्य गर्न नयाँ व्यवस्था आवश्यक भएको जनाइएको छ।
नयाँ व्यवस्थापछि नेपाल मेडिकल काउन्सिलमा दर्ता भएका जुनसुकै चिकित्सकबाट स्वास्थ्य परीक्षण गराई प्रमाणपत्र प्राप्त गर्न सकिने भएकाले सेवाग्राहीले आफ्नो सुविधा अनुसार चिकित्सक छनोट गर्न सक्नेछन्। यसबाट सेवा प्राप्त गर्ने समय, खर्च र झन्झटमा उल्लेख्य कमी आउने अपेक्षा गरिएको छ।
पारदर्शी र एकरूप प्रणालीको अपेक्षा
विभागले नयाँ व्यवस्थाले स्वास्थ्य परीक्षण प्रणालीलाई थप व्यवस्थित, मर्यादित, पारदर्शी तथा एकरूप बनाउने विश्वास व्यक्त गरेको छ। साथै सेवाग्राहीले सहज रूपमा सेवा पाउने वातावरण सिर्जना हुने र अनावश्यक प्रशासनिक जटिलता हट्ने अपेक्षा पनि गरिएको छ।
संघीय सरकारले सार्वजनिक सेवा प्रवाहलाई सरल, छरितो र नागरिकमैत्री बनाउने नीति अनुरूप यो निर्णय महत्वपूर्ण कदमका रूपमा हेरिएको छ।
मेडिकल काउन्सिलसँग समन्वय
नयाँ व्यवस्था प्रभावकारी रूपमा कार्यान्वयन गर्न यातायात व्यवस्था विभागले नेपाल मेडिकल काउन्सिलसँग आवश्यक समन्वय प्रक्रिया पनि अघि बढाएको छ।
विभागले साउन १ गते नेपाल मेडिकल काउन्सिललाई पत्राचार गर्दै काउन्सिलमा दर्ता भएका तथा इजाजत प्राप्त चिकित्सकहरूको आधिकारिक विवरण उपलब्ध गराइदिन अनुरोध गरेको छ। उक्त विवरण प्राप्त भएपछि स्वास्थ्य परीक्षणका लागि योग्य चिकित्सकहरूको सूची तयार गरी कार्यान्वयन प्रक्रिया थप व्यवस्थित बनाइने विभागको तयारी छ।
यस निर्णयसँगै अब लाइसेन्सका लागि स्वास्थ्य परीक्षण गराउन सीमित अस्पताल वा चिकित्सकमा निर्भर रहनुपर्ने बाध्यता हट्ने अपेक्षा गरिएको छ। यसले सेवाग्राहीलाई सहजता प्रदान गर्नुका साथै स्वास्थ्य परीक्षण प्रक्रियामा प्रतिस्पर्धा, पारदर्शिता र गुणस्तरसमेत अभिवृद्धि हुने विश्वास गरिएको छ।
