काठमाडौं - मनसुनको न्यूनचापीय रेखा पश्चिमतर्फ सरदर स्थानभन्दा केही उत्तर सरेर नेपालतर्फ नजिकिएसँगै देशका विभिन्न क्षेत्रमा वर्षाको सम्भावना बढेको छ। जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार नेपालको पूर्वी क्षेत्रमा भने न्यूनचापीय रेखा सरदर स्थानकै आसपास रहेको छ।
मौसमविद्का अनुसार मनसुनको न्यूनचापीय रेखा नेपाल नजिक हुँदा वर्षाको गतिविधि बढ्ने गर्छ। महाशाखाले आज बिहान ८ बजे जारी गरेको मौसम बुलेटिनअनुसार देशका विभिन्न भूभागमा मेघगर्जन र चट्याङसहित वर्षाको सम्भावना रहेको छ।
दिउँसो कहाँ-कहाँ वर्षा ?
दिउँसो देशका हिमाली तथा पहाडी भूभागका केही स्थानमा मेघगर्जन/चट्याङसहित मध्यमसम्म वर्षा तथा हिमपात हुने सम्भावना छ।
त्यस्तै, बागमती, गण्डकी, लुम्बिनी र सुदूरपश्चिम प्रदेशका तराई भूभागका केही स्थानमा तथा मधेस र कोशी प्रदेशका तराई भूभागका थोरै स्थानमा मेघगर्जन/चट्याङसहित मध्यमसम्म वर्षाको सम्भावना रहेको महाशाखाले जनाएको छ।
यसैगरी कोशी, बागमती र गण्डकी प्रदेशका हिमाली भूभाग तथा बागमती, गण्डकी, लुम्बिनी र कर्णाली प्रदेशका पहाडी भूभागका एक–दुई स्थानमा भारी वर्षा हुन सक्ने पूर्वानुमान गरिएको छ।
राति पनि वर्षाको सम्भावना
रातिको समयमा पनि देशका विभिन्न क्षेत्रमा वर्षाको सम्भावना कायमै रहनेछ। कोशी, बागमती र गण्डकी प्रदेशका हिमाली भूभागका केही स्थान तथा लुम्बिनी, कर्णाली र सुदूरपश्चिम प्रदेशका हिमाली भूभागका थोरै स्थानमा मेघगर्जन/चट्याङसहित मध्यमसम्म वर्षा तथा हिमपात हुन सक्नेछ।
त्यस्तै, कोशी, बागमती, गण्डकी र लुम्बिनी प्रदेशका पहाडी भूभागका धेरै स्थान तथा कर्णाली र सुदूरपश्चिम प्रदेशका पहाडी भूभागका थोरै स्थानमा मेघगर्जन/चट्याङसहित मध्यमसम्म वर्षाको सम्भावना रहेको छ।
मधेस प्रदेश तथा कोशी, बागमती, गण्डकी र लुम्बिनी प्रदेशका तराई भूभागका केही स्थानमा र सुदूरपश्चिम प्रदेशको तराई भूभागका थोरै स्थानमा पनि मेघगर्जन/चट्याङसहित मध्यमसम्म वर्षा हुन सक्ने महाशाखाले जनाएको छ।
राति कोशी, बागमती र गण्डकी प्रदेशका हिमाली तथा पहाडी भूभागका साथै लुम्बिनी प्रदेशका पहाडी भूभागका एक–दुई स्थानमा भारी वर्षा हुने सम्भावना रहेको छ।
बाढी, पहिरो र डुबानको जोखिम
मनसुनको न्यूनचापीय रेखा नेपाल नजिकिएसँगै वर्षाको गतिविधि बढ्ने भएकाले भारी वर्षा हुने स्थानमा बाढी, पहिरो तथा डुबानको जोखिम बढ्न सक्ने देखिएको छ। विशेषगरी पहाडी तथा हिमाली क्षेत्रमा यात्रा गर्दा मौसमको अवस्था र सम्बन्धित निकायको सूचना हेरेर मात्रै यात्रा गर्न मौसमविद्ले सुझाव दिएका छन्।
लगातार वा भारी वर्षा हुने क्षेत्रमा नदी तथा खोलानालाको बहाव बढ्न सक्ने भएकाले तटीय क्षेत्रमा बसोबास गर्ने तथा यात्रा गर्नेहरूले आवश्यक सतर्कता अपनाउनुपर्ने देखिन्छ।
