काठमाडौं– देशका विभिन्न क्षेत्रमा अविरल वर्षा भइरहेका बेला जल तथा मौसम विज्ञान विभागले किसानलाई तत्काल धान नकाट्न आग्रह गरेको छ। लगातारको वर्षाका कारण बाढी, पहिरो तथा डुबानको जोखिम बढेकाले मौसमको अवस्था सुधार भएपछि मात्र धान काट्ने योजना बनाउन विभागले सुझाव दिएको हो।
विभागका मौसमविद् रोजन लामिछानेले प्रतिकूल मौसमका बीच हतार गरेर धान काट्दा बालीसँगै जनधनको समेत क्षति हुनसक्ने भएकाले किसानलाई सावधानी अपनाउन आग्रह गरेका छन्।
उनका अनुसार मौसम खुलेपछि मात्र खेतमा गएर धान काट्ने योजना बनाउनुपर्छ। विशेषगरी पानी परिरहेको समयमा खेत तथा खोलानालाको आसपासमा काम गर्दा थप जोखिम हुनसक्ने भएकाले किसानले मौसमसम्बन्धी सूचना हेरेर मात्र कृषि कार्य गर्नुपर्ने उनको सुझाव छ।
पश्चिमी क्षेत्रमा अझै वर्षाको प्रभाव
मौसमविद् लामिछानेका अनुसार नेपालको पूर्वी भूभागमा मौसम क्रमिक रूपमा सुधार हुँदै गएको छ। पूर्वका केही स्थानमा हल्कादेखि मध्यम वर्षा भए पनि पश्चिमी भूभागमा भने मौसमको प्रभाव अझै रहने देखिएको छ।
उनका अनुसार पश्चिमी क्षेत्रमा पछिल्ला तीन–चार दिनदेखि लगातार वर्षा भइरहेको र थप वर्षाको सम्भावना भोलिसम्म रहेकाले ती क्षेत्र तुलनात्मक रूपमा बढी जोखिममा छन्।
जमिन चिरिएको र पहिरो देखिएका क्षेत्रमा उच्च जोखिम
विभागले जमिन चिरा परेको, सानो पहिरो गएको वा जमिन अस्थिर देखिएको क्षेत्रका बासिन्दालाई विशेष सतर्कता अपनाउन आग्रह गरेको छ।
त्यस्ता क्षेत्रमा जोखिम देखिएमा तत्काल सुरक्षित स्थानमा सर्न र छिमेकीलाई समेत सचेत गराउन मौसमविद् लामिछानेले अनुरोध गरेका छन्।
नदी किनारका बासिन्दालाई सतर्क रहन आग्रह
लगातारको वर्षाका कारण नदी तथा खोलाको जलसतह बढ्न सक्ने भएकाले नदी तटीय क्षेत्रमा बसोबास गर्ने समुदायलाई विशेष सावधानी अपनाउन विभागले आग्रह गरेको छ।
स्थानीय प्रशासन तथा प्रहरीले गर्ने माइकिङ, साइरन र अन्य पूर्वसूचनालाई बेवास्ता नगर्न विभागले अनुरोध गरेको छ। नदीको पानीको सतह बढ्दै गएको अवस्थामा सुरक्षित स्थानतर्फ जान ढिलाइ नगर्न पनि आग्रह गरिएको छ।
मौसमको सूचना नियमित हेर्न आग्रह
विभागले विपद्को समयमा समयमै सूचना प्राप्त गर्नु महत्वपूर्ण हुने भन्दै सर्वसाधारणलाई मौसम तथा बाढीसम्बन्धी पछिल्लो सूचना नियमित रूपमा हेर्न आग्रह गरेको छ।
मौसमसम्बन्धी जिज्ञासा वा थप जानकारी आवश्यक परेमा विभागको टोल फ्री नम्बर ११५५ मा सम्पर्क गर्न सकिने जनाएको छ।
विभागले किसानलाई अहिलेको प्रतिकूल मौसममा धान काट्नेभन्दा मौसमको अवस्था सुधारिएपछि मात्र कृषि कार्य अघि बढाउन र पश्चिमी तथा नदी तटीय क्षेत्रमा रहेका नागरिकलाई विशेष सतर्कता अपनाउन आग्रह गरेको छ।
