काठमाडौँ -फिफा विश्वकप फुटबल प्रतियोगिताअन्तर्गत आज सम्पन्न रोमाञ्चक खेलमा इंग्ल्याण्डले क्रोएसियालाई ४–२ गोलअन्तरले पराजित गर्दै महत्वपूर्ण तीन अंक हात पारेको छ। अमेरिकाको डालासस्थित रंगशालामा भएको प्रतिस्पर्धात्मक खेलमा कप्तान ह्यारी केनको उत्कृष्ट प्रदर्शनले इंग्ल्याण्डलाई प्रभावशाली जित दिलाएको हो।
खेलको सुरुआतदेखि नै आक्रामक देखिएको इंग्ल्याण्डले १२औँ मिनेटमा अग्रता बनायो। क्रोएसियाली डिफेन्सले फाउल गरेपछि प्राप्त पेनाल्टी अवसरलाई कप्तान ह्यारी केनले सदुपयोग गर्दै टोलीलाई १–० को अग्रता दिलाए।
तर क्रोएसियाले पनि उत्कृष्ट पुनरागमन गर्यो। खेलको ३६औँ मिनेटमा मार्टिन बुटुरिनाले सुन्दर गोल गर्दै खेललाई १–१ को बराबरीमा ल्याए। बराबरीपछि खेल थप रोमाञ्चक बनेको थियो।
पहिलो हाफ सकिन चार मिनेट बाँकी रहँदा फेरि ह्यारी केनले व्यक्तिगत दोस्रो गोल गर्दै इंग्ल्याण्डलाई २–१ को अग्रता दिलाए। तर पहिलो हाफको अतिरिक्त समयमा क्रोएसियाका पिटर मुसाले गोल गर्दै खेललाई पुनः २–२ को बराबरीमा पुर्याए। यससँगै पहिलो हाफ निकै प्रतिस्पर्धात्मक बनेको थियो।
दोस्रो हाफ सुरु भएको दुई मिनेटमै इंग्ल्याण्डले निर्णायक अग्रता लिन सफल भयो। ४७औँ मिनेटमा युवा स्टार जुड बेलिङ्हमले गोल गर्दै इंग्ल्याण्डलाई ३–२ को स्थितिमा पुर्याए। त्यसपछि इंग्ल्याण्डले खेलमा आफ्नो नियन्त्रण कायम राख्दै क्रोएसियामाथि लगातार दबाब सिर्जना गरिरह्यो।
खेलको ८५औँ मिनेटमा मैदानमा प्रतिस्थापनका रूपमा आएका मार्कस र्यासफोड ले उत्कृष्ट गोल गर्दै इंग्ल्याण्डको अग्रता ४–२ मा पुर्याए। त्यसपछि बाँकी समयमा दुवै टोलीबाट थप गोल हुन नसकेपछि इंग्ल्याण्डले सहज जित निकाल्न सफल भयो।
यो जितसँगै इंग्ल्याण्डले प्रतियोगितामा आफ्नो उपाधि यात्रालाई थप बलियो बनाएको छ। विशेषगरी कप्तान ह्यारी केनको दोहोरो गोल र जुड बेलिङ्हमको प्रभावशाली प्रदर्शनले टोलीको आक्रमण शक्ति कति बलियो छ भन्ने संकेत दिएको छ।
यसैबीच, प्रतियोगिताअन्तर्गत घाना र पानामाबीचको खेल जारी रहेको छ। आजै बिहान ७ः४५ बजे हुने अर्को खेलमा उज्बेकिस्तान र कोलम्बिया आमनेसामने हुनेछन्, जसको नतिजाले समूह चरणको समीकरणमा थप रोचकता थप्ने अपेक्षा गरिएको छ।
