पोखरा-कास्कीको पृथ्वीचोकस्थित पोखरा बसपार्क क्षेत्रमा रहेको बास्तोला कम्प्लेक्सभित्रका संरचनाहरू पोखरा महानगरपालिकाले हटाएको छ। शनिबार (असार ६) महानगरपालिकाको पहलमा कम्प्लेक्सभित्र रहेका ३२० वटा टहरा पूर्ण रूपमा हटाइएको हो।
पोखरा महानगरपालिका–९ का वडाध्यक्ष दीपेन्द्र मर्सानीका अनुसार बसपार्क क्षेत्रको व्यवस्थापन, सौन्दर्यीकरण तथा दीर्घकालीन पूर्वाधार विकास योजनाअनुसार टहराहरू हटाउने काम सम्पन्न गरिएको हो। हटाइएका अधिकांश टहरामा विभिन्न साना तथा मझौला व्यवसाय सञ्चालन हुँदै आएका थिए।
टहरा हटाउनुअघि पोखरा महानगरपालिकाका प्रमुख धनराज आचार्यले बास्तोला कम्प्लेक्सका सञ्चालक तथा त्यहाँ व्यवसाय गर्दै आएका व्यवसायीहरूसँग छलफल गरेका थिए। छलफलपछि आपसी सहमतिमै संरचना हटाउने निर्णय भएको महानगरपालिकाले जनाएको छ।
महानगरका अनुसार बसपार्क क्षेत्रलाई व्यवस्थित, सुरक्षित र आधुनिक बनाउन आवश्यक पूर्वाधार निर्माणको तयारी भइरहेको छ। वर्षौंदेखि अस्थायी रूपमा सञ्चालनमा रहेका टहराहरूले बसपार्क क्षेत्रको व्यवस्थापनमा चुनौती सिर्जना गर्दै आएको भन्दै महानगरले चरणबद्ध रूपमा क्षेत्र सुधार अभियान अघि बढाएको जनाएको छ।
टहरा हटाइएपछि व्यवसायीहरूको पुनःस्थापना, वैकल्पिक व्यवस्थापन तथा जीविकोपार्जनमा पर्न सक्ने प्रभावबारे पनि महानगरले आवश्यक समन्वय गर्ने प्रतिबद्धता जनाएको छ। यद्यपि केही व्यवसायीहरूले आफ्नो व्यापार प्रभावित भएको भन्दै उचित व्यवस्थापनको माग गरेका छन्।
पोखराको प्रमुख प्रवेशद्वारका रूपमा परिचित पृथ्वीचोक तथा बसपार्क क्षेत्रलाई व्यवस्थित बनाउने उद्देश्यले महानगरले पछिल्लो समय विभिन्न संरचना व्यवस्थापन तथा अतिक्रमण हटाउने अभियान सञ्चालन गर्दै आएको छ। बास्तोला कम्प्लेक्सका टहरा हटाइएसँगै बसपार्क क्षेत्रको नयाँ स्वरूप निर्माणका लागि थप काम अगाडि बढ्ने अपेक्षा गरिएको छ।
