काठमाडौं - फिफा विश्वकप २०२६ अन्तर्गत समूह ‘के’ को खेलमा पोर्चुगलले उज्वेकिस्तानमाथि प्रभावशाली प्रदर्शन गर्दै ५–० गोलअन्तरको शानदार जित दर्ता गरेको छ। स्टार खेलाडी क्रिस्टियानो रोनाल्डोले दुई गोल गर्दै टोलीको जितमा निर्णायक भूमिका निर्वाह गरे।
पोर्चुगलले खेलको सुरुवातदेखि नै उज्वेकिस्तानमाथि दबाब सिर्जना गरेको थियो। खेलको छैटौँ मिनेटमै कर्नरबाट आएको बललाई सदुपयोग गर्दै कप्तान क्रिस्टियानो रोनाल्डोले उत्कृष्ट गोल गरेपछि पोर्चुगलले अग्रता लिएको थियो।
त्यसपछि १७औँ मिनेटमा नुनो मेन्डेसले अर्को गोल थप्दै टोलीको अग्रता दोब्बर बनाए। पहिलो हाफ सकिनुअघि ३९औँ मिनेटमा रोनाल्डोले व्यक्तिगत दोस्रो गोल गर्दै पोर्चुगललाई ३–० को मजबुत अवस्थामा पुर्याए।
दोस्रो हाफमा पनि पोर्चुगलको आक्रामक खेल जारी रह्यो। खेलको ६०औँ मिनेटमा उज्वेकिस्तानका अब्दवोहिद नेमातोवबाट आत्मघाती गोल भएपछि पोर्चुगलले ४–० को अग्रता बनायो। खेलको ८७औँ मिनेटमा राफाएल लीओले अर्को गोल थप्दै पोर्चुगलको फराकिलो जित सुनिश्चित गरे।
समूह ‘के’ मा पोर्चुगल शीर्ष स्थानमा
यस जितसँगै पोर्चुगलले दुई खेलबाट चार अंक जोड्दै समूह ‘के’ को शीर्ष स्थानमा उक्लिएको छ। पहिलो खेलमा पोर्चुगलले कङ्गोसँग बराबरी खेलेको थियो।
यता, लगातार दोस्रो हार बेहोरेको उज्वेकिस्तान भने अंकविहीन रहँदै समूहको पुछारमा पुगेको छ।
आजका अन्य खेल
फिफा विश्वकपअन्तर्गत आज थप तीन खेल हुँदैछन्–
- इङ्ल्याण्ड बनाम घाना – राति १:४५ बजे
- पानामा बनाम क्रोएसिया – बिहान ४:४५ बजे
- कोलम्बिया बनाम कङ्गो – बिहान ७:४५ बजे
रोनाल्डोको उत्कृष्ट प्रदर्शनसँगै पोर्चुगलले नकआउट चरणतर्फ बलियो कदम चालेको छ भने उज्वेकिस्तानमाथि अर्को हारको दबाब थपिएको छ।
