काठमाडौं - गण्डकी प्रदेशका पूर्वमन्त्री राजीव गुरुङ ‘दीपक मनाङे’ नेपाली कांग्रेसमा प्रवेश गरेका छन् ।
नेपाली कांग्रेसका नेता डा. शशांक कोइरालाले मंगलबार गुरुङलाई पार्टीमा स्वागत गर्दै कांग्रेसमा प्रवेश गराएका हुन् । कोइराला पूर्वसभापति शेरबहादुर देउवा पक्षबाट गठित १५औँ महाधिवेशन तयारी समितिका संयोजक हुन् ।
कांग्रेस प्रवेशसँगै गुरुङलाई मनाङ जिल्लाको अधिवेशन आयोजक समितिको संयोजकको जिम्मेवारीसमेत दिइएको छ । देउवा पक्षले असोज १५ गतेदेखि वडा अधिवेशन सुरु गर्ने गरी महाधिवेशनको तयारी अघि बढाइरहेको छ ।
राजीव गुरुङ २०७९ सालको प्रदेशसभा निर्वाचनमा मनाङबाट स्वतन्त्र उम्मेदवारका रूपमा निर्विरोध निर्वाचित भएका थिए । त्यसपछि उनी नेकपा (एकीकृत समाजवादी) मा प्रवेश गरेका थिए ।
गुरुङ गण्डकी प्रदेश सरकारमा मन्त्रीसमेत बनेका थिए । सर्वोच्च अदालतको फैसलापछि उनको प्रदेशसभा सदस्य पद खारेज भएको थियो । अदालतको फैसलामा ज्यान मार्ने उद्योगसम्बन्धी फौजदारी कसुरमा अन्तिम फैसला भएपछि प्रदेशसभा सदस्यको योग्यतामा असर पर्ने ठहर गरिएको थियो ।
गुरुङ पछिल्लो समय कैद सजाय भुक्तान गरी कारागारबाट मुक्त भएका थिए ।
