काठमाडौं-धादिङको झ्याप्लेखोलामा पहिरोले पुरिएको माईक्रोवसका १४ यात्रु मध्ये चालकसहित तीन यात्रुको पहिचान खुलेको छ । बुटवलवाट काठमाडौंका लागि चालकसहित १४ यात्रु लिएर हिडेको लु १ ज ४५७८ नम्बरको विंगर बस शुक्रबार राति नै पुरिएको भए पनि शनिबार साँझमात्रै गाडी र यात्रुको शव फेला परेको थियो ।
गाडीबाट ८ पुरूष, ५ महिला र १ बच्चाको शव निकालिएको प्रहरीले जनाएको छ । हालसम्म चालक रमेश लुइँटेल, बुटवल १६ सेमलारकी सिर्जना कुँवर र प्रकाश कुँवरको पहिचान खुलेको कार्कीले बताएका छन् ।
पश्चिम नेपाल बस व्यवसायी समितिको बुटवलस्थित टिकट काउन्टरका कर्मचारी लक्ष्मण कार्कीका अनुसार गाडीले बुटवलबाट १३ जना यात्रु लिएर शुक्रबार बिहान हिँडेको थियो ।
बसले बुटवल ट्राफिकचोकस्थित टिकट काउन्टरबाट बुटवल कालिकानगरका ३ जना, देवीनगरका ३ जना र सुख्खानगरका ३ जनाले टिकट काटेको कर्मचारी कार्कीले बताए । गाडी चालक रमेश लुइँटेलले चलाएका थिए । ‘यहाँबाट ९ जनाले टिकट काटेका थिए,’ उनले भने, ‘चालकसहित गाडीमा १४ जना थिए । प्रहरीले सबैको शव निकालेको जानकारी प्राप्त भएको छ ।’ गाडी बुटवलबाट काठमाडौंका लागि छुटेको भए पनि सबै शवको सनाखत हुन नसकेको उनले बताए ।
