पोखरा - सहकारी ठगी र संगठित अपराधमा पक्राउ परेका राष्ट्रिय स्वतन्त्र पार्टीका सभापति एवं पूर्व गृहमन्त्री रवि लामिछाने कास्की प्रहरीको खोरमा थुनिएका छन । प्रहरीको केन्द्रीय अनुसन्धान ब्युरो (सीआईबींं) को टोलीले शुक्रबार साँझ काठमाडौंमा समातेर लामिछानेलाई राता रात स्थलमार्गबाट पोखरा ल्याएर अनुसन्धानका लागि गएराति पौने तीन बजेतिर कास्की प्रहरीको जिम्मा लगाएको हो । यसअघि लामिछानेलाई सिधै पोखरा स्वास्थ्य विज्ञान प्रतिष्ठानमा लगेर स्वास्थ्य परीक्षण गरिएको थियो । लामिछानेलाई आईतवार जिल्ला अदालत कास्कीमा लगिने भएको छ ।
लामिछाने पक्राउ परेपछि रास्वपाका केही कार्यकर्ताले बाटोमा र कास्की प्रहरी कार्यालय अघि नाराबाजी गरेका थिए ।
कुनै ठाउँमा सहकारी पीडितले पनि जनताका पैसा ठगी गर्नेलाई कार्बाही गर भन्दै नाराबाजीमा उत्रिएका थिए । लामिछानेमाथि सूर्यदर्शन लगायतका सहकारी ठगीको आरोप छ । उनलाई संसदीय छानबिन विशेष समितिले समेत सहकारी बचत अपचलन गरेको निष्कर्ष निकाल्दै अनुसन्धान गर्न सिफारिस गरेको थियो ।
लामिछानेले गोर्खा मिडिया नेटवर्कको तत्कालीन प्रबन्ध निर्देशक हुँदा सहकारीको बचत उक्त मिडियामा लगेर अपचलन गरेको आरोप छ ।
पोखराको सूर्यदर्शन सहकारी ठगी प्रकरणमा लामिछाने गोर्खा मिडिया नेटवर्कको सञ्चालक हुँदा जोडिएका थिए । सूर्यदर्शनसहित विभिन्न सहकारीबाट गोर्खा मिडियामा गएको ६५ करोड रकम खर्च गर्दा लामिछानेको हस्ताक्षर भेटिएको थियो । संसदीय छानबिन समितिले नै लामिछानेलाई कारबाही गर्न सिफारिस गरेको थियो । कास्कीमा सूर्य दर्शन सहकारीका पीडितहरुले गत माघ २२ गते लामिछानेविरुद्ध पनि जिल्ला प्रहरी कार्यालय कास्कीमा पूरक उजुरी दर्ता गरेका थिए ।
पोखराको मुख्य बजारको चोक चोकमा प्रहरी परिचालन
लामिछानेलाई पक्राउ गरेर हिरासतमा राखिएपछि संभावित विरोध प्रर्दशनलाई हेरेर कास्की प्रशासनले पोखरा वजारका मुख्य मुख्य चोकमा विहानैदेखि प्रहरी परिचालन गरेको छ । पोखराको जिल्ला प्रहरी कार्यालय कास्कीको कार्यालय अगाडि, पालिखेचोक, महेन्द्रपुल, चिप्लेढुंगा, पृथ्वीचोक, सभागृहचोक लगायतका चोकहरुमा प्रहरीहरु सर्तक अवस्थामा परिचालन गरिएको छ ।
कास्कीका प्रमुख जिल्ला अधिकारी भरतमणि पाण्डेले आवश्यक सुरक्षा प्रबन्ध गरिएको बताए । आवश्यकता अनुसार नै सम्भावित ुरेड जोनु तोकिएको र त्यहाँ सोही अनुरूपको सुरक्षा प्रबन्ध गरिएको उनको भनाइ छ ।
