काठमाडौँ - काठमाडौँ महानगरपालिकाका मेयर बालेन शाह, राष्ट्रिय स्वतन्त्र पार्टीका सभापति रवि लामिछाने र जेनजी अभियान्ता लगायतका नयाँ तथा वैकल्पिक राजनीतिक शक्तिहरू आगामी निर्वाचनमा एकीकृत शक्ति बनाएर जाने कसरतमा जुटेका छन्।

समानुपातिकतर्फ उम्मेदवारी मनोनयन दर्ता गर्ने मिति नजिकिँदै जाँदा नयाँ दलहरूले भेटघाट, छलफल र बार्ता–संवादहरू तीव्र बनाउँदै लगेका हुन ।

केहि दिन यता भएका भेटघाटमा आशन्न निर्वाचनका लागि साझा एजेण्डा, सिट बाँडफाँड, उम्मेदवार छनोट र चुनावी रणनीतिबारे प्रारम्भिक छलफल भइरहेको बताइएको छ । भ्रष्टाचार नियन्त्रण, सुशासन, सेवा प्रवाह सुधार र युवामुखी राजनीति साझा एजेण्डाका रूपमा अगाडि सार्ने तयारी उनिहरुले गरेका छन् ।

एकीकृत शक्तिका रूपमा निर्वाचनमा जाने विषयमा अझै औपचारिक सहमति नभएपनि आज दिनभर जसो काठमाडौँ महानगरपालिका मेयर बालेन शाह र स्वतन्त्र पार्टी सभापति रवि लामिछानेबीच भएको संवाद भएको थियो ।

ललितपुरमा भएको छलफलमा जनेजी अभियान्ता सहित अन्य बैकल्पिक एवम् नयाँ भनिएका राजनीतिक शक्तिहरुको पनि उपस्थित रहेको बताइएको छ । अहिले पनि नयाँ राजनीतिक दल नेता र अभियान्त बीच एकीकृत बैकल्पिक शक्तिको एजेण्डा र भावि नेतृत्वको विषयमा छलफल जारी रहेको जनाइएको छ।

नयाँ शक्तिहरु भिन्न भिन्न भएर निर्वाचनमा जाँदा अपेक्षित परिणाम आउन नकस्ने निश्कर्ष सहित बैकल्पिक शक्तिहरु छलफलमा जुटेका हुन ।  नयाँ दलहरू साझा मोर्चामा निर्वाचनमा गए भने परम्परागत दलहरूलाई आफ्नो मत जोगाइ राख्ने सहज नहुँने विश्लेषण गरिएको छ ।

काठमाडौँ महानगरपालिका मेयर बालेन्द्र साह बालेनले बुधबारदेखि विभिन्न राजनीतिक दलका नेता, पूर्वप्रशासक, सामाजिक अभियान्ता, कलाकार, पत्रकार तथा जेनजी समूहका विभिन्न युवाहरूसँग म्याराथन छलफल गरिरहेका छन्। उनी निरन्तर छलफलमै छन्।

उनले हिजो बुधबार साँझ नागरिक उन्मुक्ति पार्टी नेपालका संरक्षक रशेम चौधरी, राप्रपा नेता ज्ञानेन्द्र शाही, मुटुरोग विशेषज्ञ डा। भगवान कोइराला, अभियन्ता सागर ढकाल, पूर्वसचिव भीम उपाध्याय, पूर्व विवकेशील साझाका नेता मिलन पाण्डे, कलाकार निश्चल बस्नेत, पत्रकार ऋषि धमला, सञ्चार उद्यमी कैलाश सिरोहिया र सञ्चारकर्मी सुरजसिंह ठकुरीलगायत जनेजीका विभिन्न प्रतिनिधिसँग भेट गरे।

सँगै आज उनले राष्ट्रिय स्वतन्त्र पार्टी रास्वपाका सभापति रवि लामिछानेसँग वान टु वान छलफल गरे। प्रतिगतिशील लोकतान्त्रिक पार्टीका नेता डा। बाबुरा भट्टराई, उर्जामन्त्री कुलमान घिसिङ,  कांग्रेस नेता सुनिल शर्मा, विघटित प्रतिनिधिसभा सांसद डा. अमरेशकुमार सिंहसँगै विभिन्न जेनजी युवाहरूसँग भेट गरी छलफल गरे।

बालेनले सबैसँग ललितपुरको ज्वागलस्थित कुमार ब्यञ्जनकारको घरमा भेटवार्ता गरेका हुन्। कुमार बालेनका सहयोगी हुन्।

विशेष गरेर वैकल्पिक शक्तिहरू कसरी मिलेर जान सकिन्छ भन्नेमा छलफल केन्द्रित भएको भेटपछि नेताहरूले बताउने गरेका छन्। रास्वपासँग मिलेर जाने विशेष छलफल भएको भए पनि टुंगोमा पुग्न सकेको छैन।

बालेन रास्वपासँग मिलेर जान नसकिएमा अन्य वैकल्पिक शक्तिहरूलाई एक ठाउँमा ल्याएर आफ्नै ‘देश विकास पार्टी’मार्फत निर्वाचनमा होमिने तयारी गरेका छन्। कुलमान घिसिङको पार्टी उज्यालो नेपालसँग पनि एक भएर जाने विषयमा छलफल भएको बुझिएको छ। यद्यपि, आधिकारिक विषय बाहिरिएको छैन।

हामीले बालेनसँग छलफलमा सहभागी भएका जेनजी समूहका एक अगुवा प्रदीप ज्ञवालीसँग भेटमा के भयोर ?  बालेन कसरी अगाडि बढ्न चाहेका छन्रुलगायत विषयमा कुरकानी गरेका छौँ।

प्रस्तुत छ ज्ञावलीसँग गरिएको कुराकानीको सम्पादित अंश-

बालेनले जेनजी युवाहरूसँग छलफल गरेको विषय छ। जेनजी युवाहरू क-कससँग बालेनले भेट्नुभएको हो ?

हामी सामुहिक रुपमा केही जेनजीहरूले भेटेको हो। किनभने एक प्रकारले उहाँहरू राजनीतिकरुपमा अगाडि आउने भनिसक्नुभएको छ। त्यसका कारण विभिन्न स्टेकहोस्डरलाई भेटिरहँदाखेरी जेनजी पनि भदौ २३ र २४ गतेको आन्दोलनपछि मुख्य स्टेकहोल्डर हो। त्यसैले सबै जेनजी सुदन गुरुङ, रक्षा बम, म प्रदीप ज्ञावली लगायतलाई भेटेर कुराकानी गर्नुभएको हो।

जेनजीको विभिन्न समूह देखिन्छ। बालेनले विशेष केही समूहलाई मात्र भेटेको हो कि के हो ?

त्यस्तो समूहभन्दा पनि उहाँले उपस्थित सबै जेनजीलाई भेट्नु भएको हो। अहिले हेर्ने हो भने सबै जेनजीहरू एक ठाउँमा पनि हुनुहुन्छ। किनभने वैकल्पिक राजनीतिक कोर्सलाई अगाडि बढाउनुपर्ने छ।

वैकल्पिक राजनीतिक सोच राख्ने साथीहरू र अगाडि बढाउन चाहने साथीहरू सबैलाई भेट्नु भएको हो। व्यक्तिगत एक जना वा कुनै निश्चित समूहले मात्र भेटेको होइन। भेटमा सबैले आफ्नो कुरा राख्नुभयो। मेयरसाप (बालेन)ले पनि आफ्ना कुरा राख्नुभयो।

छलफलमा बालेनले के भन्नुभयो ?

उहाँले म राजनीतिमा आइसके भन्नुभयो। उहाँले मैले हिजोदेखि राजनीतिका विभिन्न स्टेकहोल्डरसँग भेटेको देखिरहनुभएको छ, तपाईंहरू पनि एउटा स्टेकहोल्डर हो भन्नुभयो। त्यसकारण अब हामी सँगै जाऔँ, यो पुस्तामा सबै २५ वर्ष नपुगेको पनि हुनसक्छ। २५ वर्ष नपुगेका साथीहरूले सहयोग गर्नुपर्‍यो। म पनि छु भन्ने गरी अगाडि बढ्नुपर्‍यो भन्नुभयो।

बालेनले प्रधानमन्त्री बन्ने विषय पनि बाहिर आइरहेको छ। तपाईंहरूसँग पनि त्यसै किसिमको कुरा भयो कि के भयो ?

उहाँले म प्रधानमन्त्री बन्ने किसिमको कुरा गरेको गलत कुरा हो। त्यसरी कुरा भएन। उहाँले तपाईंहरू मुख्य स्टेकहोल्डर हो, सहयोग गर्नुपर्‍यो भन्नु भएको हो।

के तपाईंहरू बालेनलाई सहयोग गर्न तयार हुनुहुन्छ ?

अँ। हामी सबै जेनजीहरूले खोजेकै वैकल्पिक राजनीति गर्ने व्यक्ति सबै एक ठाउँ आउनुपर्छ भन्ने हो। सबै मिलेर वैकल्पिक शक्तिहरू एकठाउँ आयो भने सहयोग गर्न तयार नै छौँ।

बालेनसँग छलफल पहिले पनि हुने गरेको थियो कि पहिलोपटक हो ?

उहाँसँग हाम्रो छलफल हिजो र आज मात्र भएको हो। पहिले हुने गरेको थिएन।

बालेनले कुनवादी भनेर छुट्याएको देखिँदैन। सबै दलका नेताहरूसँग छलफल गरेको देखिन्छ। तपाईंहरूलाई बालेन कसरी अगाडि बढ्ने बताउनु भएको छ ?

उहाँले हामीलाई स्पष्ट भन्नुभएको छ, यो संविधानप्रति कटिबद्ध छु भनेर। संविधानलाई यताउति गरेर अगाडि बढ्ने भन्ने होइन भन्नुभएको छ। अहिले जे छ त्यसैमा टेकेर जाने हो।

र अन्य दलमा भएका राम्रा व्यक्तिसँग सहकार्यमा लिएर सँगै लिएर जाने पनि भन्नु भएको छ।